Partia Demokratike e Kosovës i është adresuar medieve rreth punës së sesionit pranveror të Kuvendit të Kosovës.
Shefi i deputetëve të PDK-së, Abelard Tahiri tha se 30 pika kanë mbetur pa u trajtuar gjatë këtij sesioni, derisa fajësoi mazhorancën për dështim të disa seancave.
“Sesioni pranveror ka filluar në fund të janarit me 30 pika të papërfunduara të sesionit vjeshtor. Po ashtu po e përmbyllim këtë sesion me 30 pika të papërfunduara. Mund të them se punë efektive kanë qenë tre muaj e gjysmë, për shkak të dështimit të njëpasnjëshëm të seancave. Gjatë këtij sesioni grupi parlamentar i PDK-së ka iniciuar katër komisione hetimore. Vetëm njërin prej tyre kemi arritur ta themelojmë”, deklaroi ai.
Tahiri foli edhe për dërgimin e disa ligjeve në Kushtetuese nga partia e tij.
“Si grup parlamentar i PDK-së gjatë sesionit pranveror kemi fituar betejën që ka të bëjë me Byronë për Konfiskim të Pasurisë që binte në kundërshtim me rendin kushtetues. Ne i kemi nisur edhe dy beteja tjera kushtetuese atë për Këshillin e Pavarur për Media dhe Këshillin Prokurorial të Kosovës”, tha ai.
