Zyra e Bashkimit Evropian në Kosovë ka njoftuar rreth takimeve të fundit të bëra nga ambasadori i BE-së në Kosovë, Tomáš Szunyog, me rastin e përfundimit të mandatit të tij.
Përmes një postimi të bërë në faqen zyrtare, thuhet se Szunyog pati një sërë takimesh lamtumirëse me liderët kryesorë të Kosovës, duke përfshirë këtu presidenten Vjosa Osmani, kryeparlamentarin Glauk Konjufca, kryeministrin Albin Kurti, zëvendëskryeministrin Besnik Bislimi si dhe zëvendëskryeministren Emilija Rexhepi.
“Në takimin e tij me presidenten e Kosovës, Vjosa Osmani, ambasadori Szunyog e falënderoi për bashkëpunimin dhe rikonfirmoi përkushtimin e palëkundur të BE-së për të mbështetur Kosovën në rrugën e saj drejt BE-së”, thuhet në njoftim.
Në takimin me kryeparlamentarin Glauk Konjufca, Szunyog shprehu mirënjohje për bashkëpunimin e tyre ndër vite.
“Ambasadori Szunyog përsëriti rëndësinë e miratimit të ligjeve që përputhen me standardet evropiane për të ndihmuar Kosovën të përparojë në rrugën e saj drejt BE-së”, thuhet në njoftim.
Gjatë takimit me kryeministrin Albin Kurti, ai e falënderoi kryeministrin për bashkëpunimin dhe rikonfirmoi rolin e BE-së si një partner stabil dhe i pazëvendësueshëm për Kosovën. Gjithashtu e inkurajoi përshpejtimin e reformave të nevojshme për rrugën e Kosovës në BE.
Ambasadori Szunyog, në takim më zëvendëskryeministrit Besnik Bislimi, shprehi falënderime për bashkëpunimin në çështjet thelbësore që kanë të bëjnë me integrimet evropiane.
“Në takimin me zëvendëskryeministrin Besnik Bislimi, duke e falënderuar për bashkëpunimin në çështjet thelbësore që kanë të bëjnë me integrimet evropiane, ai theksoi se rruga evropiane e Kosovës kalon përmes dialogut të lehtësuar nga BE-ja, e vetmja platformë praktike për adresimin e çështjeve të pazgjidhura”, thuhet në njoftim e Zyrës së BE-së në Kosovë.
Ndërsa në takimin me zëvendëskryeministren Emilija Rexhepi, ai shprehu mirënjohjen për bashkëpunimin e mirë gjatë mandatit të tij. Ai theksoi rëndësinë e respektimit të plotë të të drejtave të njeriut dhe të drejtave të komuniteteve joshumicë për përparimin e Kosovës në rrugën drejt BE-së.
Rikujtojmë që ambasadori Szunyog është një diplomat çek, me një përvojë të gjatë me çështjet e BE-së dhe shërbimin në Evropën Juglindore. Ai mori postin e Shefit të Zyrës së BE-së në Kosovë më 1 shtator 2020.
