Asamblisti nga radhët e Lëvizjes Vetëvendosje, Gëzim Sveçla, ka thënë se edhe në seancën e kaluar të Kuvendit Komunal të Prishtinës, pushteti LDK-PDK, i ka votuar dy vendime për këmbim të pronave e që sipas tij ka parregullësi në dokumentacione.
Asamblisti Sveçla bëri të ditur se grupi i Vetëvendosjes i ka kundërshtuar këto vendime për shkak të parregullësive të shumta në dokumentacione dhe për rrjedhojë ka votuar kundër.
Ai thotë se MAPL gjatë shqyrtimit të këtyre vendimeve ka gjetur parregullësi dhe të njëjtat i ka vlerësuar se nuk janë në pajtim me dispozitat e legjislacionit në fuqi.
“Përseri, si shumë herë më parë, u dëshmua se kundërshtimet tona kanë qenë plotësisht të bazuara dhe parimore kurse Komuna e Prishtinës vazhdon të jetë kampione për vendime të paligjshme në nivel vendi”, shkroi ai në Facebook.
