Rasti i manifestimit të maturantëve serb një ditë më parë në Mitrovicën e veriut, sipas ministrit në detyrë të Punëve të Brendshme, Xhelal Sveçla, po përdoret për propagandë nga pala serbe.
Megjithatë sipas ministrit në detyrë, kjo propagandë mund të ketë efekt vetëm tek të painformuarit dhe qarqet nacionaliste në Serbi.
“Ja si duket propaganda serbe: Kërkesën e zyrtarit policor që grupi mos të provokojë qytetarët në mënyrë që situata mos të eskalojë ata e quajnë dhunë dhe vendosjen e dorës e quajnë ngufatje. Shfaqjet e tyre të ekstremizmit dhe shovinizmit i quajnë festë, kurse ngjyrën e kuqe me të cilën ata kanë ngjyrosur figura të ndryshme në trup tentojnë ta paraqesin si gjak. Asgjë e re nga ta! Kjo propagandë mund të ketë efekt vetëm tek të painformuarit dhe qarqet nacionaliste në Serbi”, shkroi, Sveçla, pas reagimeve të shumta nga pala serbe në Kosovë e Serbi lidhur me situatën e krijuar dje në Mitrovicën e Veriut.
Me këtë rast tha të ketë qenë i tronditur shefi i misionit të EULEX-it në Kosovë, Giovanni Pietro Barbano.
“Jam thellësisht i tronditur dhe dënoj përdorimin e tepruar të forcës të treguar sot nga një pjesëtar i PK-së kundër një djali të ri në Mitrovicën e Veriut”, kishte shkruar ai një ditë më parë, derisa, Lista Serbe, parti që mbështetet nga Beogradi ka kërkuar hetim rreth rastit.
Me flamuj serb, këngë nacionaliste e me provokime duke ngritur tre gishtërinj ishte përcjellë defilimi i maturantëve në Mitrovicën e Veriut një ditë më parë, për çka Policia thotë se reagoi për të parandaluar eskalimin e situatës.
