Ministri i Punëve të Brendshme, Xhelal Sveçla, ka falënderuar deputetët e të gjitha subjekteve politike për votimin në parim e Ligjit për Zyrtarët Publik dhe atë për Paga përgjatë seancës plenare të së premtes.
Sveçla falënderimin e ka shprehur me anë të një postimi në llogarinë zyrtare të tij në ‘Facebook’, teksa ka thënë se shpreson se të dy ligjet e sipërpërmendura do të votohen edhe në lexim të dytë, përgjatë këtij viti.
“Dua të falenderoj sot të gjithë deputetët nga të gjitha subjektet politike që mbështetën me votën e tyre Ligjin për zyrtarët publik dhe Ligjin për pagat në lexim të parë”, deklaroi ai.
“Po ashtu mirënjohje për dhjetra e qindrave zyrtare e zyrtarë, specialistë e shërbyes civil që punuan e komentuan me detaje këto dy projektligje që janë të ndërvarura me njëra – tjetrën dhe të pandashme për të mbërritur rezultatin e duhur”.
“Është pritje e imja dhe besoj e çdo zyrtari publik që të njëjtat të votohen edhe në lexim të dytë brenda këtij viti”, përfundon Sveçla.
Me 61 vota për dhe një abstenim është miratuar sot në parim projektligji për zyrtarët publikë.
