Ministri i Brendshëm, Xhelal Sveçla, ka thënë se ka indikacione se në veprimet në veri të Kosovës, ka elemente të Rusisë.
“Ne po e përcjellim situatën, jemi jashtëzakonisht aktivë në mbledhjen e informatave, edhe të kësaj natyre, ka edhe deklarime edhe indikacionet se mund të ketë elemente të Rusisë, që janë të interesuara që të shkaktojnë trazira e eskalim të situatës atje”, është shprehur Sveçla, në një konferencë për media.
Ai ka thënë se institucionet e vendit do parandalojnë çfarëdo ndikimi negativ për situatën e sigurisë atje.
“Jam i bindur që institucionet e Kosovës në koordinim me partnerët ndërkombëtarë do të jenë të suksesshëm në parandalimin, neutralizimin e çfarëdo ndikimi negativ, të kujtdoqoftë në raport me sigurinë atje”, ka theksuar Sveçla.
Sveçla: 578 policë dhanë dorëheqje në Mitrovicën e Veriut, u rrezikohet jeta nëse nuk e bëjnë
Ministri i Punëve të Brendshme, Xhelal Sveçla, tha se në drejtorinë rajonale të Policisë së Kosovës në Mitrovicën e Veriut janë paraqitur afro 600 dorëheqje të zyrtarëve serbë.
“Zyrtarisht janë paraqitur 578 dorëheqje, prej të cilave 461 nga policia e rendit publik, 107 nga policia kufitare dhe 10 nga hetimi”, tha Sveçla në një konferencë për media.
Ai tha se policëve serbë u rrezikohet jeta nëse nuk japin dorëheqje, pasi janë të kërcënuar, raporton KosovaNews.
“Dorëheqjet po vijnë pas kërcënimeve dhe shantazheve, me ç’rast rrezikohet edhe ekzistenca e vetë këtyre zyrtarëve policorë në rast se nuk japin dorëheqja”, tha ai.
