Ministri i Ushqimit dhe Bujqësisë të Gjermanisë, Cem Ozdemir, sot do të vizitojë Kosovën.
Në një njoftim për media të Qeverisë bëhet e ditur se kryeministri i Republikës së Kosovës, Albin Kurti, sot pasdite e pret në takim ministrin gjerman Ozdemir.
Qëllimi i kësaj vizite është fokusi në procesin e integrimit të vendeve të Ballkanit Perëndimor.
Ministri federal gjerman i Bujqësisë, Cem Ozdemir, ka deklaruar se Kosova sërish është nën presion masiv nga Serbia. Ai tha se Kosova është viktimë e një gjenocidi që erdhi po nga Serbia.
“Kosova është sërish nën presion masiv nga Serbia. Viktimë e një gjenocidi që erdhi po nga Serbia. Trupa të çuditshëm që vijnë nga veriu dhe natyrisht nuk kanë lidhje me Presidentin e Serbisë dhe Serbinë, ashtu si në Gadishullin e Krimesë, ku fillimisht ushtarët atje nuk kishin asnjë lidhje me zotin Putin. Pra, ne e njohim këtë model të destabilizimit”, ka shkruar ai.
Reagimin e ministrit gjerman e ka shpërndarë edhe ambasadori i Kosovës në Gjermani, Faruk Ajeti, i cili e ka falënderuar ministrin për qëndrimin e tij karshi situatës së krijuar së fundi pas sulmit terrorist në veri të Kosovës nga një grup i uniformuar i serbëve që u organizuar nga Serbia.
