Ministrja e Ekonomisë, Artane Rizvanolli kë bërë të ditur se në njësitë B-1 dhe B-2 të TC Kosova B, sipas Bilancit Vjetor të Energjisë Elektrike për vitin 2023, të gjitha remontet dhe revizionet për secilën njësi prodhuese kanë përfunduar me sukses duke hapur rrugën për zbatimin e projektit të financuar nga BE për vendosjen e filterëve për NOx dhe SOx.
Ajo tha se projekti për vendosjen e filterëve për NOx dhe Sox po vazhdon sipas planit dhe të dy njësitë do të jenë në prodhim gjatë sezonit dimëror.
Gjithashtu, Rizvanolli tha se sipas planit të Bilancit Vjetor të Energjisë Elektrike, në TC Kosova A, janë realizuar remontet dhe revizionet e rregullta vjetore në njësitë A-3 dhe A-5. Ndërkohë, në njësinë A-4 është duke u realizuar remonti i rregullt vjetor, i cili do të jetë i gatshëm për operim në javën e parë të muajit dhjetor.
“Gjithë plani i operimit me njësitë gjeneruese të TC Kosova A (A-3, A-4, A-5) dhe TC Kosova B (B-1, B-2) sigurohet dhe garantohet edhe nga prodhimi nga Divizioni i Prodhimit të Qymyrit. Ky nivel i përgatitjes për sezonin dimëror dhe gjendja e infrastrukturës nga ana e Korporatës Energjetike të Kosovës (KEK) tregon se qytetarët tanë do të jenë të furnizuar me energji elektrike më të qëndrueshme nga burimet vendore të prodhimit”, përfundoi ministrja.
