Vajzat adoleshente raportojnë nivele më të larta vetmie sesa grupet e tjera. Në këtë përfundim ka arritur një një raport i ri i Organizatës Botërore të Shëndetësisë.
Sipas OBSH-së, një në gjashtë persona në mbarë botën është i vetmuar dhe qindra mijëra vdesin çdo vit si pasojë e kësaj.
Shqetësimet për një epidemi të vetmisë kanë zënë vend në kulturën pop dhe politikë vitet e fundit, dhe Komisioni i OBSH-së për Lidhjet Sociale synonte të përcaktonte saktësisht se kush është në rrezik dhe çfarë do të thotë kjo për mirëqenien e tyre.
Raporti zbuloi se të rinjtë janë më të prekur nga vetmia, me rreth 20.9 përqind të adoleshentëve dhe 17.4 përqind të të rriturve nën 30 vjeç që thonë se ndihen të vetmuar. Kjo krahasuar me 11.8 përqind të atyre të moshës 60 vjeç e lart.
Në përgjithësi, burrat dhe gratë ndihen pothuajse njësoj, por vajzat adoleshente janë grupi më i vetmuar, me 24.3 përqind që thonë se janë të vetmuara.
“Ka shumë faktorë që po nxisin vetminë dhe izolimin”, tha Dr. Vivek Murthy, ish-kirurgu i përgjithshëm i SHBA-së dhe bashkëkryetar i komisionit, gjatë një konference për shtyp.
Ai përmendi si probleme kryesore; shëndetin e dobët fizik dhe mendor, i cili për fat të keq mund t’i izolojë më tej individët”, si dhe margjinalizimin social dhe përdorimin gjithnjë e më të dëmshëm ose të tepërt të mediave digjitale, veçanërisht midis të rinjve.
Ekspertët e OBSH-së u bënë thirrje qeverive kombëtare që ta bëjnë vetminë një përparësi politike dhe për më shumë kërkime mbi strategjitë që mund të ndihmojnë në forcimin e lidhjeve sociale.
