Selektori i Spanjës, Luis de la Fuente ka publikuar të hënën listën e zgjeruar me 29 lojtarë në të cilët llogarit për Kampionatin Evropian të futbollit “Gjermania 2024”. Evropiani fillon më 14 qershor, ndërsa De la Fuente më 8 qershor do të publikojë ekipin final që mund të përbëhet deri në 26 lojtarë.
Spanja është në Grupin B të Evropianit së bashku me Kroacinë, Italinë dhe Shqipërinë. Ky vlerësohet grupi më i fortë i Evropianit në Gjermani.
Më 15 qershor, Spanja luan ndaj Kroacisë në Berlin. Më 19 qershor përballet me Italinë në Gelsenkirchen, ndërsa më 24 qershor është ndeshja Shqipëri – Spanjë në Duesseldorf.
Nacho Fernandez i Real Madridit, Fermin Lopez i Barcelonës dhe Ayoze Perez i Betisit janë risitë më të mëdha në listë.
Spanja luan miqësore ndaj Andorrës më 5 qershor dhe ndaj Irlandës Veriore më 8 qershor.
Emrat më të mëdhenj që mungojnë në listën e Spanjës janë Marco Asensio i PSG-së, Lucas Vazquez i Real Madridit, Oihan Sancet i Athletic Bilbaos dhe Gerardo Moreno i Villarrealit.
Lamine Yamal dhe Pau Cubarsi pritet të jenë në ngjarjen e parë të madhe, por fillimisht duhet të përfshihen në ekipin final.
Plot 16 skuadra kanë lojtarë në përfaqësuese. Barcelona dhe Real Sociedadi përfaqësohen me nga pesë lojtarë. Athletic Bilbao dhe Real Madridi i kanë nga tre lojtarë, Atletico Madridi dy e 11 klube të tjera nga një.
