Ministria e Financave e ka zgjatur deri sot kohën për paraqitjen fizike të përfituesve të skemave pensionale në Departamentin e Pensioneve. Kështu gjithë pensionistët do të kenë kohë të lajmërohen për verifikim deri në ora 15:00 dhe pastaj mos të kenë probleme në marrjen e pensionit.
Sipas rregulloreve, çdo përfitues që nuk e kryen këtë obligim do të pezullohet nga pagesa sipas procedurave ligjore. Ministri i Financave, Hekuran Murati sot ka sqaruar se edhe për ata që nuk kanë arritur deri sot të lajmërohen, pagesat e pensioneve nuk do të humbin.
Për çështjen e pensionistëve dy ditë më parë foli edhe ministri i Financave, Hekuran Murati, i cili tha se paraqitja fizike në zyrat Departamentit të Pensioneve për verifikim, është kërkesë ligjore, pavarësisht se pezullimi kishte ndodhur për shkak të pandemisë.
Ai tha se kjo mënyrë po kthehet për t’u aplikuar sepse duan të sigurohen që pensionet po shkojnë në adresën e duhur.
“Ka qenë një periudhë pezullimi kur kjo kërkesë ligjore ka qenë e pezulluar për shkak të pandemisë, megjithatë marrë parasysh numrin që kemi pa që ka raste shpeshherë ai zinxhiri i raportimit nuk funksionon sa duhet nëpër institucione të tjera dhe nëpër disa komuna ose regjione, e kemi pa të nevojshme që të rikthejmë edhe një herë që të bëhet një ri-shoshitje dhe të sigurohemi që numri i pension-marrëseve të jetë i saktë sepse jemi të përkushtuar që të kemi mbështetje të dinjitetshme për të gjitha kategoritë shoqërore në vend, megjithatë duam po ashtu të sigurohemi që paratë po shkojnë në adresën e duhur, aty ku ka nevojë, edhe ky proces është bërë me këtë gjë në mendje”, ka thënë të premten Murati.
Ai tha se numri paraqitjeve po ndryshon çdo orë por shtoi se shumica dërrmuese tashmë e kanë kryer këtë obligim.
Ministri Murati tha se për pensionistët me probleme shëndetësore verifikimi kryhet nga ekipet mobile.
Ai ka sqaruar se për gjithë pensionistët që lajmërohen më vonë, nuk do të ketë probleme dhe se pagesa e pensionit do t’ju bëhet në mënyrë retroaktive.
“Mjafton që dikush prej familjes të paraqitet në zyrën e pensioneve dhe ekipi mobil shkon dhe nëse ka raste të gjendjes së rënduar shëndetësore, por edhe të çështja e këtij afati ka të bëjë me pezullimin e përkohshëm, pra kurdo që paraqitet me vonë, gjatë muajve të ardhshëm mund t’i kthehet retroaktivisht pensioni vetëm se pezullohet për momentin për të pasur mundësi që institucionet e vendit ta bëjnë verifikimin e duhur për pension-marrësit”, përfundoi Murati.
Afati i paraqitjes fizike të pensionistëve në objektet e Departament të Pensioneve apo i vizitës mobile nga zyrtarët e këtij departamenti do të përfundojë sot në ora 15:00.
Qeveria e Kosovës në kohën e fundit ka ndarë dy herë shtesa për pensionistët, si dhe disa kategori të tjera të shoqërisë, për t’iu ndihmuar të përballojnë çmimet në rritje.
Sipas të dhënave zyrtare, në Kosovë aktualisht jetojnë rreth 200.000 pensionistë.
Prej tyre, rreth 148.000 janë përfitues të pensionit të pleqërisë, që do të thotë se marrin nga 100 euro në muaj, ndërsa më pak se 50.000 janë kontributpagues. Këta të fundit ndahen në katër kategori dhe marrin nga 182 deri në 265 euro në muaj, varësisht shkollimit që kanë pasur./KosovaNews/
