Ardita Sinani, këshilltare e kryeministrit të Kosovës Albin Kurti për Luginën e Preshevës, e ka akuzuar kryetarin e Komunës së Preshevës, Shqiprim Arifi, se është i shantazhuar dhe i kontrolluar nga Beogradi, teksa këto deklarata të saj Arifi i ka cilësuar shpifje.
Sipas Sinanit, gjatë mëngjesit të së dielës, për herë të parë në historinë e Kuvendit Komunal në Preshevë, është mbajtur seancë e jashtëzakonshme që nuk është transmetuar askund. Ajo ka thënë se seanca të tilla mbahen për zgjatje të jetës politike të Shqiprim Arifit.
“Është zgjatje e jetës politike, sepse ditëve të fundit, pakënaqësitë me udhëheqjen e pushtetit lokal përveç se nga jashtë taborit politik të shumicës, ato u shpërfaqën edhe brenda tij. Duke sjellë kështu situatën kur një këshilltar nga radhët e APN-së dhe subjekti politik UDSH të distancohen nga politikat e të parit të Komunës dhe duke u tërhequr nga shumica qeverisëse në pushtetin lokal në Preshevë. Prandaj është zgjatje e jetës politike të një individi”, ka shkruar ajo në Facebook.
Sinani më tej është shprehur se në seancën e së dielës që thotë se është mbajtur në mënyrë tinzare, kanë marrë pjesë 18 këshilltarë komunalë shqiptarë dhe këshilltarë serbë.
“Sepse sot, në ditë vikendi, pa mbulim mediatik, në mënyrë tinëzare një shumicë e brishtë prej 20 këshilltarëve, prej tyre 18 këshilltarë shqiptarë dhe 2 këshilltarë serbë brenda më pak se 5 minutave u bënë pjesë e një turpi që do të mbahet mend gjatë. Në ato pak minuta të të ashtuquajturës ‘seancë’, u kaluan një mori pikash të rendit ditës, pa asnjë diskutim, pa asnjë debat dhe pa asnjë sqarim se pse ky pushtet lokal pati ngërç politik sa të vijë puna që në limitet e afatit ligjor të mbajë ‘seancë’”, ka theksuar ajo.
Ajo e ka akuzuar Arifin për zhytje në “llumin e nëntokës së politikës së Beogradit”, i cili seancën e ka mbajtur nën arsyetimin për të shqyrtuar situatën politike në Preshevë.
“Mbase do të dalin në pah edhe marrëveshjet e errëta me Listën serbe, grupacion politik që dihet botërisht që vendimet politike për të qenë apo jo të përfshirë në ndonjë akrobacion të tillë si ky i sotshmi, i merr nga qendra në Beograd. Gjegjësisht nga Aleksandër Vuçiqi. Mbase edhe do të kuptohet nga të gjithë, pse një grupacion politik shqiptar në Preshevë, i quajtur nga Shqiprim Arifi, PATERICË, duhej të ishte pjesë edhe e këtij turpi si ky i sotmi”, ka shkruar ajo. “Tash çdo shqiptar në Preshevë, Luginë e kudo, e ka kuptuar pse Shqiprim Arifi me plot “guxim” çirret ndaj institucioneve të Republikës së Kosovës e Shqipërisë, e nuk guxon të thotë asnjë fjalë për shefin e BIA-s që Thesari shtetëror amerikan i shpall sanksione. Sepse nga andej është i shantazhuar, dirigjuar e kontrolluar”, ka shtuar Sinani.
Kryetari i Preshevës nga ana tjetër deklaratat e Sinanit i ka cilësuar si shpifje, sepse siç ka thënë ai, Asambleja komunale ka shumicë shqiptare.
“Janë shpifje të zonjës së dëshmuar shpifëse. Asambleja komunale ka shumicë shqiptare”, ka thënë ai.
KOHA e ka siguruar edhe dokumentin me rendin e ditës të seancës së të dielës, ku thuhet se është propozuar shqyrtimi i situatës aktuale politike dhe dalja nga bllokimi i Kuvendit Komunal, si dhe shqyrtimi dhe miratimi i rishikimit të buxhetit të programuar të Komunës së Preshevës për vitin 2023.
Në dokument thuhet se partitë opozitare e kanë bllokuar Kuvendin Komunal, me qëllim që vendi të shkojë në zgjedhje të reja dhe se ky bllokim është përkrahur edhe nga kryetari i Lëvizjhes Vetëvendosje, Albin Kurti.
Ragmi Mustafi nga Këshilli Kombëtar Shqiptar në Luginën e Preshevës, me anë të një fotografie brenda Kuvendit Komunal, të ndarë në Facebook, e ka akuzuar Arifin për pazare e patericë të presidentit serb, Aleksandar Vuçiq dhe kryediplomatit Ivica Daçiq.
