Komuna e Prishtinës ka shtyrë afatin për pranimin e ofertave për tenderin “Konsulencë për themelimin e Shërbimit të Arkitektit të Kryeqytetit për nevojat e Komunës së Prishtinës” edhe për 9 ditë të tjera.
Komuna e Prishtinës më datë 22 korrik të këtij viti ka hapur aktivitetin e prokurimit me emërtimin “Konsulencë për themelimin e Shërbimit të Arkitektit të Kryeqytetit për nevojat e Komunës së Prishtinës”, i cili e kap vlerën e 12 milion eurove.
Në dosjen e tenderit thuhet se qëllimi i këtij projekti është krijimi i hartës unike të planifikimit të kryeqytetit, krijimi i bazave te shënimeve, krijimi i bazës së sistemit gjeografik të informacionit, krijimi i rregulloreve dhe manualeve të nevojshme për funksionimin e pakove programore për përcjelljen e lejeve, ndërtimeve, mirëmbajtjeve, tatimit dhe shërbimeve komunale dhe krijimi i sistemit interaktiv online të komunikimit me qytetarët.
Në njoftimin e publikuar sot në sistemin elektornik të prokurimit publik thuhet se tekstit i cili duhet të modifikohet nga njoftimi fillestar ka të bëjë me afatin e fundit për pranim të tenderëve/aplikacioneve, në vend të datës 31.08.2022, data 09.09.2022.
Rreth këtij aktiviteti të prokurimit ka pasur reagime të shumta nga partitë politike opozitare në Komunën e Prishtinës si dhe nga shoqëria civile.
Në një konferencë për media të mbajtur nga Lëvizja VETËVENDOSJE! Qendra në Prishtinë asambleistët Triera Kasumi Berisha dhe Gëzim Sveçla që kanë thënë se kjo kontratë është e dyshimtë, pasi është fushë e njëjtë profesionale me atë të kryetarit Rama, dhe se ky tender që Komunës Prishtinës i kushton sa 13 për qind e buxhetit të përgjithshëm vjetor në fushatë është përmendur sipërfaqësisht, ndërsa në Kuvend Komunal nuk është diskutuar fare.
Shemsi Jashari nga Instituti Kosovar për Qeverisje Lokale duke u bazuar në profilin e kryetarit Rama dhe në biznesin e tij që ndërlidhet me këtë fushë ka shprehur dyshime rreth asaj se kush do të jetë fitues i këtij tenderi andaj sipas tij shpallja e një tenderi me këtë shumë do duhej të kishte nje transparencë më të madhe./KosovaNews/
