Qeveria e Kosovës i ka ndarë 150 milionë euro për mbështetje të qytetarëve në kuadër të pakos për përballen me inflacionin, e cila është vazhdimësi e pakos për ringjalljen ekonomike.
Por me këtë mbështetje nuk është i kënaqur kryetari i Aleancës për Ardhmërinë e Kosovës, Ramush Haradinaj, i cili e ka kritikuar Qeverinë Kurti, duke e cilësuar kryeministrin Albin Kurti “mashtrues ordiner”.
Sipas tij, Qeveria po mundohet ta mbajë shtetin me “vitra”.
Ai ka komentuar vendimin e fundit të Qeverisë për shtesa për pensionistët.
Sipas tij, zgjidhja bëhet me masa të përhershme. Ka ftuar për rritje të pensioneve.
“Jetesa në Kosovë po bëhet e papërballueshme, si pasojë e rritjes pa kontroll të çmimeve, e Kryeministri në stilin e një mashtruesi ordiner, provon që duke ndarë lëmoshë t’i mbajë ‘gjallë’ pensionistët të cilët me aq sa marrin nuk i sigurojnë dot as ilaçet. Shteti nuk mbahet me ‘vitra’, herë 50 euro e herë 100 euro! Zgjidhja është me masa të përhershme. Rriti pagat e pensionet e mos e shndërro shtetin në ‘cirk social’. Pensionistët kanë nevojë për dinjitet e jo për lëmoshë. Nëse nuk di, merr shembull nga shtetet përreth”, ka shkruar Haradinaj në Facebook.
Në fillim të muajit shtator, Qeveria e Kosovës ka prezantuar një pako mbështetëse për qytetarët, për të cilën kryeministri Albin Kurti tha se do të jenë ndihmë në kuadër të pakos për përballen me inflacionin, e cila është vazhdimësi e pakos për ringjalljen ekonomike.
Kurti tha se familjet me asistencë sociale do të mbështeten me dyfishim të shumës së asistencës për një muaj, shtatorin. Pensionistët do të marrin nga 100 euro për muajin shtator, ndërsa shumën e njëjtë do ta marrin edhe studentët, në nëntor.
Nga 100 euro do të marrin edhe punëtorët e ndërmarrjeve publike dhe kjo është ndihmë e njëhershme.
Sipas tij, nga shtatori nga 50 euro shtesë do të marrin punëtorët e sektorit publik.
Ndërsa për punëtorët e sektorit privat u tha se Qeveria do të subvencionojë për tre muaj ato biznese që i rrisin pagat e punëtorëve, pra gjysmën e rritjes së pagës së tyre për tre muaj.
Në total, Kurti tha se do të ndahen 150 milionë euro për pakon për përballen me inflacion./KosovaNews/
