Kryetari i Sindikatës së Punëtorëve të Sektorit Privat, Jusuf Azemi, ka kërkuar të rritet numri i inspektorëve që i monitorojnë kompanitë e ndërtimit, pas rritjes së rasteve të vdekjes së punëtorëve në vendet e punës.
Ai ka thënë se siguria e punëtorëve në vend është shqetësuese, pasi mbi 80 për qind e kompanive nuk e respektojnë ligjin për pajisjet e sigurisë dhe të shëndetit në punë.
Sipas tij, për çështjen e punëtorëve të sektorit privat faj kanë edhe qeveritë e kaluara, pasi nuk janë marrë sa duhet me këtë sektor.
“Punëtorët e sektorit privat të Kosovës e në veçanti për çështjen e sigurisë, pjesë e fajit janë edhe qeveritë e më hershme sepse ne kemi qenë gjithherë aktivë dhe kemi kërkuar nga ta që të merren më seriozisht me këtë çështje. Cilat janë hapat që duhet të merren, së pari ne e kemi humbur hapin dhe në rend të parë unë mendoj që numri i inspektorëve do të jetë shumë më i madh. Në moment kur vërehet që në një kompani që nuk i ka masat mbrojtjes adekuate siç i thotë ligji, ajo kompani menjëherë duhet që të mbyllet dhe përderisa mos t’i sanojë çështjet që kanë të bëjë me ligjin, ajo duhet që të mbyllet”, ka thënë për OE, Azemi.
Sipas statistikave të fundit të Sindikatës së Punëtorëve të Sektorit Privat, vetëm në shtatë muajt e parë të këtij viti në vendin e punës kanë vdekur 18 persona, ku pjesa më e madhe e rasteve kanë ndodhur në sektorin e ndërtimtarisë.
“Jemi të vetëdijshëm dhe po shohim që diku mbi 80 për qind e kompanive nuk i respektojnë pajisjet e sigurisë dhe shëndetit në punë. Shpeshherë që po i obligojnë punëtoret dhe punëtorët nuk po mbajnë pajiset. Por ligji thotë në moment kur punëtori nuk do ta vejë pajisjen në trupin e tij për mbrojtje, ai duhet të shkojë në shtëpi, por kjo nuk po ndodhë”, është shprehur ai.
