Për herë të fundit po dalin para Gjykatës Themelore në Prishtinë. Janë këta ish-zyrtarë policorë nga komuniteti serb e shqiptarë, të cilët do të dëgjojnë vendimin e gjykatës për ta.
13 prej 19 të akuzuarve janë shpallur fajtor. Gjykata ka vërtetuar përtej dyshimit të bazuar se ata kanë pranuar shuma të ndryshme të parave duke lejuar futjen e mallrave ilegale në Kosovë, nga Serbia përmes rrugëve ilegale.
Kështu, Zvezdan Spasojeviq u dënua me 3 vjet burgim, Biljana Nedeljkoviq me 2 vjet e 3 muaj, Miljan Milenkoviq, me 1 vjet e 10 muaj burg, Albert Maxhuni me 2 vjet burgim, Abdurrahim Haxhiq me 2 vjet burgim, Ramadan Mustafiq 2 vite burgim, Jasna Durleviq 1 vjet e 10 muaj burgim, Zenel Bahtiri 1 vjet e 8 muaj burgim, Ali Pllana me 1 vjet e 8 muaj burgim, Reshat Kuçi 2 vjet burgim, Vukadin Tomasheviq 1 vjet e 6 muaj burgim, Burim Merovci 6 muaj burgim, Blagoje Lazoviq 1 vjet e 6 muaj burgim.
Derisa, 6 të tjerët janë liruar nga akuzat, në mungesë të provave. Gjykata ka shqiptuar edhe dënim plotësues ndaj të dënuarve.
“U ndalohet ushtrimi i funksioneve në administratën publike 2 vite pas mbajtjes së dënimit”, ka thënë Mentor Bajraktari – Kryetar i trupit gjykues.
Mirëpo ku vendim, nuk u mirëprit nga të dënuarit e avokatët mbrojtës, të cilët edhe paralajmëruan ankesë në Gjykatën e Apelit.
“Sot kam pritur aktgjykim lirues për mua personalisht, këta na kanë gjykuar pa asnjë provë materiale asnjë provë nuk ka pasur, kjo prej fillimit ka qenë politik”, ka deklaruar Albert Maxhuni – I dënuar.
“Klienti im Blagoje Lazoviq, është shpallur fajtor për keqpërdorim i pozitës zyrtare dhe është dënuar me 1 vit e 6 muaj burgim, nuk jemi të kënaqur me vendimin e gjykatës mendoj sic gjykata ka liruar disa prej të akuzuarve të tjerë, e ka qenë mundësia e njëjtë me liru edhe disa persona të tjerë”, ka thënë Predrag Milkovic – Avokat i Blagoje Lazoviq.
Aktakuza kundër 20 zyrtarëve të policisë, që fillimisht kishte përfshirë 33 të akuzuar, është ngritur nga Prokuroria Speciale në maj të vitit 2020, ndërsa rasti ndaj disa prej të akuzuarve është veçuar, e disa të tjerë kanë ndërruar jetë/rtvd
