Policia e Kosovës ka bërë të ditur se ka shoqëruar në polici një person të dyshuar për falsifikim të parasë në Kaçanik.
“Më 24.04.2025, rreth orës 03:50, në rrugën “Idriz Seferi” në Kaçanik është ndaluar një veturë e tipit Seat me targa vendore, e drejtuar nga i dyshuari B. R., 23 vjeç. Gjatë kontrollit të kryer nga njësitë policore, tek i dyshuari janë gjetur dhe sekuestruar 27 kartëmonedha prej 100 dollarësh, të gjitha me numër serik të njëjtë, të dyshuara si të falsifikuara”, thuhet në njoftimin e policisë.
Tutje theksohet se pas intervistimit në stacionin policor në Kaçanik dhe në konsultim me prokurorin kujdestar, është iniciuar rasti “Falsifikim i parasë”.
“Në vijim të veprimeve hetimore, është realizuar një bastisje në shtëpinë e të dyshuarit në Han të Elezit, ku janë gjetur dhe sekuestruar municion i ndryshëm, mjete të mprehta, një boks hekuri, një shkop bejzbolli si dhe një shkrepëse në formë armë. Për këtë është iniciuar rasti i dytë ‘Mbajtje në pronësi, posedim apo kontroll të paautorizuar të armëve’”, thuhet tutje në njoftim.
Hetimet lidhur me këtë rast janë në vijim.
