Shoferët e linjës Podujevë-Prishtinë po vazhdojnë grevën, duke refuzuar të largohen nga rruga ‘Ilir Konushevci’ dhe hapësira përballë Komunës, derisa të shfuqizohet vendimi që ua ndalon qarkullimin në kryeqytet. Komuna e Prishtinës kërkon që autobusët ndërurbanë ta përdorin Stacionin e Autobusëve, ndërsa kryetari Përparim Rama ka njoftuar për një reformë në transportin publik, duke inkorporuar biletën ndërurbane në sistemin urban falas.
Grevistët e linjës Podujevë-Prishtinë thonë se janë të vendosur që të qëndrojnë me autobusët e tyre në rrugën ‘Ilir Konushevci’ dhe përballë komunës deri në shfuqizim të vendimit të komunës së Prishtinës, për t’ua lejuar qarkullimin në kryeqytet.
“Na do të vazhdojmë deri në një vendim që të tërheq nga vendimet, që i ka bo komuna deri në qëllimet e tona”, tha Beqir Mustafa, kryetar i shoqatës së transportit në Podujevë.
“Greva duhet të vazhdojë nëse nuk shfuqizohet vendimi i komunës së Prishtinës”, tha Afrim Leci, nga shoqata e autobusëve, Podujevë-Prishtinë.
Zyrtarët komunalë nuk folën para kamerës, por në një përgjigje nga Komuna thuhet se protestuesit nga Podujeva duhet ta respektojnë vendimin që kërkon që linjat ndërurbane t`i përdorin rrugët rajonale dhe ta kenë si pikë ndalimi Stacionin e Autobusëve, ashtu siç veprojnë edhe linjat nga qytetet e tjera të Kosovës. Sipas tyre, autobusët nga Podujeva kanë rënduar trafikun dhe se kanë ndërhyrë në kompetencat e trafikut urban, i cili është përgjegjës për shërbimet e trafikut brenda kryeqytetit.
Në anën tjetër, kryetari i Prishtinës, Përparim Rama, ka njoftuar se ka marrë vendim që biletën ndërurbane ta inkorporojë falas si biletë gjithëditore në transportin urban në kryeqytet.
“Ky është edhe një hap tjetër i rëndësishëm në procesin e reformës për transportin publik në kryeqytet, nga i cili do të përfitojnë edhe qytetarët e kryeqytetit. Me këtë organizim të ri të transportit publik, kryeqyteti do të ketë më pak vetura, më pak trafik, më pak ndotje ambientale dhe më shumë organizim dhe siguri”, tha Rama.
Sipas tij, ky vendim është pjesë e reformës së transportit publik urban, që sipas tij, shënon një hap të madh në përmirësimin e shërbimeve publike.
