Ministria e Mjedisit, Planifikimit Hapësinor dhe Infrastrukturës (MMPHI), ka dërguar dje në Prokurorinë Speciale dy raste të dyshimit për shkelje të rënda të ligjit.
Këtë e ka bërë të ditur vetë zëvendësministri i kësaj ministrie, Avni Zogiani, i cili tha se shpreson që Prokuroria Speciale të gjejë kohë e vullnet për këto dy dosje.
Zogiani tha se rasti i parë ka të bëjë me hapjen e procedurës për trajtimin termik të mbeturinave, për të cilin grupet e ekspertëve të MMPHI kanë gjetur shkelje serioze dhe dyshime për manipulim të të dhënave e dokumenteve.
Rasti i dytë, sipas Zogianit po ashtu ka të bëjë me dyshime për keqpërdorime serioze në punët në fushën e ujërave, të cilat punë sipas Raportit të bërë nga Grupi i ekspertëve janë bërë pa kritere, me shkelje serioze të ligjit deri në masën që ka dyshime se punët janë paguar pa u vënë kurrë në praktikë.
