Një sherr ka ndodhur të martën në Leposaviq, por jo mes personave të zakonshëm. Kësaj radhe në sherr e përleshje fizike për shkak të një mosmarrëveshjeje në trafik, është përfshirë një gjykatëse dhe një polic i Kosovës.
Lidhur me rastin është njoftuar edhe Prokuroria e Mitrovicës, ku dhe ka konfirmuar se rasti është iniciuar si “Sulm”.
“Për rastin është njoftuar prokurori kujdestar, dhe është iniciuar në drejtim të veprës penale “Sulmi”. Dyshohet që rasti ka ndodhur pas një mos marrëveshje të çastit në komunikacion”, ka thënë zëdhënësi i Prokurorisë së Mitrovicës, Valon Preteni.
Ai ka shtuar se rasti është duke u hetuar edhe nga Inspektorati Policor i Kosovës, dhe i njëjti është në fazë të grumbullimit të informatave.
Ndërkaq, Inspektorati Policor i Kosovës, në një përgjigje me shkrim kanë bërë të ditur se janë duke e trajtuar rastin dhe se veprimet e mëtejme do të ndërmerren në koordinim me prokurorin.
“Duke ju referuar kërkesës suaj ju njoftojmë se IPK është njoftuar për këtë rast dhe hetuesit e IPK-së janë duke e trajtuar . Veprimet tjera do të ndërmerren bazuar në fushëveprimin ligjor të IPK-së dhe në koordinim me prokurorin kompetent”, thuhet në përgjigjen e IPK-së.
