Sekretari i përgjithshëm i Aleancës Veriatlantike, NATO, Jens Stoltenberg, ka thënë se 93 trupa të KFOR-it, mbetën të lënduar nga tensionet dhe dhuna e shfaqur në veri të Kosovës.
Këtë shifër ai e ka bërë të ditur, në një cicërimë në rrejtin social Twitter, ndërsa flet për takimin që pati me presidentin serb, Aleksandar Vuçiq, ku edhe kërkon nga Prishtina dhe Beogradi, t’i kthehen dialogut.
”Mirë të takohem me @predsednikrs për të diskutuar dhunën e fundit në veri të Kosovës, e cila la të plagosur 93 trupa @NATO_KFOR. #NATO ka dislokuar trupa shtesë dhe zbaton mandatin e saj të #OKB-së në mënyrë të paanshme. Prishtina dhe Beogradi duhet të parandalojnë përshkallëzimin dhe të angazhohen në dialogun e lehtësuar nga #BE”.
Good to meet @predsednikrs to discuss the recent violence in northern Kosovo, which left 93 @NATO_KFOR troops injured. #NATO has deployed extra troops & implements its #UN mandate impartially. Pristina & Belgrade must prevent escalation & engage in the #EU-facilitated dialogue. pic.twitter.com/2Ewq1UYmY3
— Jens Stoltenberg (@jensstoltenberg) July 19, 2023
Zyrtarisht është thënë se numri i ushtarëve të lënduar të KFOR-it gjatë trazirave në veri ishte rreth 30. Për herë të parë, Stoltenberg bëri me dije se numri është më shumë se trefish më i madh.
Situata në veri të Kosovës – zonë e banuar me shumicë serbe – është tensionuar qysh në fund të majit, kur Policia e Kosovës ka asistuar kryetarët e rinj shqiptarë të Zveçanit, Leposaviqit e Zubin Potokut të hynin në ndërtesat komunale, me gjithë rezistencën e banorëve lokalë serbë. Tensionet kanë kulmuar në dhunë më 29 maj, kur protestuesit serbë në Zveçan janë përleshur me ushtarë të KFOR-it. Dhjetëra të plagosur janë raportuar nga të dyja anët.
