Industria e mbrojtjes dhe ushtria ruse thuhet se do të marrin mikroelektronikën dhe dronët që u nevojiten përmes vendeve “mike”, përfshirë kompanitë nga Kazakistani, pavarësisht sanksioneve perëndimore.
Kjo bazohet në një hetim të përbashkët të kryer nga ueb-sajti Important Stories, Projekti i Raportimit të Krimit të Organizuar dhe Korrupsionit (OCCRP) dhe revistës Der Spiegel.
Sky News raporton se të dhënat e doganave ruse të marra nga gazetarët zbulojnë se të paktën një burim i këtyre mjeteve është nga Kazakistani.
Vitin e kaluar Rusia importoi mbi 500 dronë nga një kompani kazake e quajtur “Aspan Arba”. Kjo kompani ishte regjistruar në prillin e vitit 2022, vetëm pak muaj pas fillimit të agresionit rus në Ukrainë.
Gazeta e lajmeve për industrinë minerare kazake, Metalmininginfo, raportoi se është tregtari zyrtar i dronëve DJI në Kazakistan dhe furnizon dronë për miniera, ndërtim, operacione shpëtimi dhe punë bujqësore.
Nebesnaya Mekhanika, kompania me bazë në Moskë është një nga shitësit kryesor të dronëve DJI në Rusi.
Në muajin shkurt të këtij viti, kjo kompani mori 9,977 euro (799 mijë rubla – 8,677 funte) si pagesë për një dron nga “Fronti Popullor: Gjithçka për Fitoren”, një organizatë që kërkon donacione për të ndihmuar pajisjen e njësive ushtarake ruse.
Prodhuesi kryesor kinez DJI njoftoi në prill të vitit 2022 se nuk i shet produktet e tij as në Rusi dhe as në Ukrainë për të parandaluar përdorimin e dronëve në operacione luftarake.
