Ministri rumun i Mbrojtjes ka thënë se mbetjet e një droni të përdorur në një sulm rus në një port ukrainas janë gjetur në territorin rumun.Komentet e tij pasojnë dy ditë pasi ai dhe zyrtarë të tjerë të lartë mohuan “kategorikisht” çdo incident ndërkufitar.
Ukraina kishte këmbëngulur se kishte prova të shpërthimit, raporton BBC.
Presidenti i Rumanisë thotë se sulmi, të cilin Ministria e Mbrojtjes po heton, do të ishte një shkelje serioze e sovranitetit të Rumanisë.
Një sulm ndaj Rumanisë, e cila është anëtare e NATO-s, do të ishte “plotësisht e papranueshme”, tha Klaus Iohannis.
Të hënën, ministria e jashtme e Ukrainës kishte raportuar se dronët “ranë dhe shpërthyen” në Rumani të dielën mbrëma pas sulmit të fundit rus në portin ukrainas të Izmail.
Ai e quajti incidentin një provë të mëtejshme të “kërcënimit të madh” të paraqitur nga Moska për fqinjët e Ukrainës.
Tani ministri i Mbrojtjes i Rumanisë, Angel Tilvar, ka vizituar rajonin e Deltës së Danubit afër kufirit me Ukrainën dhe njoftoi se ishin gjetur disa pjesë të një droni.
Një hetim është duke u zhvilluar dhe fragmentet janë duke u analizuar për të përcaktuar nëse ato vijnë nga një armë ruse.
Përgënjeshtrimi i pohimeve të Kievit u bë i vështirë pasi Ministri i Jashtëm i Ukrainës Dmitro Kuleba njoftoi publikisht se kishte prova fotografike të incidentit.
Ai tha se ishte “absolutisht e qartë” ajo që kishte ndodhur dhe se “nuk kishte kuptim ta mohonim atë”.
Rusia ka goditur objektet portuale të Ukrainës përgjatë lumit Danub për disa javë pasi u tërhoq nga një marrëveshje për të lejuar Ukrainën të eksportojë drithërat e saj përmes Detit të Zi.
Porti i Izmailit, përtej Danubit nga territori rumun, u godit sërish në orët e para të së mërkurës, duke lënë një person të vdekur.
Nuk është plotësisht e qartë nëse droni u rrëzua dhe disa fragmente të dronit ranë në Rumani, apo nëse ai u rrëzua në anën rumune të kufirit.
Ministria rumune e Mbrojtjes tha më parë se kishte monitoruar situatën në Ukrainë dhe në kufi në kohë reale.
“Në asnjë moment mjetet e sulmit të përdorura nga Federata Ruse nuk gjeneruan kërcënime të drejtpërdrejta ushtarake për territorin kombëtar ose ujërat territoriale të Rumanisë,” tha ministria në një deklaratë të mëparshme.
