Deputeti i Lëvizjes Vetëvendosje, Adnan Rrustemi ka thënë se normalizimi i marrëdhënieve me Serbinë nuk mund të përmbyllet pa e njohur Serbia Kosovën edhe formalisht.
Mungesa e tanishme e diskutimit për njohje formale sipas Rrustemit duhet të shihet si kompromis i Kosovës.
“Normalizimi nuk mund të përmbyllet pa njohjen formale, dejure e defakto… e vërteta është edhe në letrën e Biden, edhe nga ne ka qenë përkushtimi për njohje dejure me njohje në qendër. Le ta paraqesim si kompromis të Kosovës, por kjo do duhej ta fitonte respektin e bashkësisë ndërkombëtare, jo ta vënte në shënjestër Kosovën”, ka thënë ai.
Për Asociacionin ai tha se është e pamundur të zbatohet mbi bazën e marrëveshjeve të viteve 2013 dhe 2015.
Sipas tij aktgjykimi i Gjykatës Kushtetuese të Kosovës e pamundëson zbatimin e atyre marrëveshjeve të cilat sipas tij kanë kompetenca ekzekutive.
“Ka një lloj pamundësie për t’u zbatu Asociacioni edhe me dashtë me themelu mbi bazën e marrëveshjes se 2013-tës dhe 2015-tës. Po te ishte i zbatueshëm kjo do të bëhej nga ata që e kanë nënshkruar, e dinë edhe ndërkombëtarët. Raporti i marrëveshjeve të kaluara dhe aktgjykimi i Gjykatës Kushtetuese e pamundëson atë implementim të atyre dy marrëveshjeve në kuptimin e themelimit të Zajednicës me kompetenca ekzekutive një etnike dhe si pushtet i tretë”, ka thënë ai./rtvd
