Një tjetër rrëshqitje dheu ka ndodhur sot në Prishtinë, kësaj radhe në lagjen Velania.
Lajmin për KosovaNews e ka konfirmuar drejtori i Shërbimit të Zjarrfikësve të Prishtinës, Abdusamed Shkodra.
Ai ka thënë se intervenimi tashmë është kryer dhe se fatmirësisht përveç katër veturave, nuk ka pasur banorë që janë rrezikuar nga rrëshqitja e dheut.
“Rreth orës 12:09 kemi pranuar informatën për rrëshqitje të dheut në rrugën “Isa Kastrati” në lagjen Velania në Prishtinë. Ekipi i zjarrfikësve ka dalë menjëherë në vendngjarje dhe ka intervenuar, ku 4 vetura që ishin të parkuara kanë qenë në rrezik nga shembja e dheut. I kemi larguar tri prej tyre, ndërsa njëra ka mbetur që tërhiqet me karrotrec”, ka thënë Shkodra.
Shkodra ka shtuar se intervenimi ka përfunduar dhe fatmirësisht nuk ka të lënduar.
Kujtojmë se të shtunën në Veternik nga rrëshqitja e dheut humbi jetën një 40 vjeçar dhe një tjetër mbeti i lënduar.
