Ministrja e Ekonomisë, Artane Rizvanolli, ka thënë se vlera e importit të energjisë elektrike këtë dimër pritet të jetë rreth 350 milionë euro.
Rizvanolli ka thënë të premten në seancë të Kuvendit të Kosovës se në periudhën tetor 2022 – mars 2023 parashihet të importohen rreth 722 megavat orë energji elektrike.
“Prodhimi i energjisë nga KEK- u dhe burimet e ripërtërishtme tetor 2022 – mars 2023, pritet të jetë 3.2 milionë megavat orë. Gjatë tetorit në operim do të jenë dy blloqe të termocentralit të Kosovës B dhe një të Kosovës A, ndërkaq gjatë muajit nëntor dy blloqe të A dhe dy blloqe të B. Sa i përket sasisë së importit, Vlerësohet që në tetor 2022 – mars 2023 në skenarin e furnizimit me dy A dhe dy B, do të jetë rreth 722 megavat orë, ndërkaq sa i përket vlerës nëse supozojmë se çmimi i importit do të jetë 500 megavat atëherë kosto e importit tetor 2022 mars 2023 do të ishte rreth 350 milionë euro”, ka thënë Rizvanolli e pyetur nga ish-ministri i Financave, Avdullah Hoti.
