UEFA të premten vërtetoi dënimin e Federatës së Futbollit të Serbisë me plot 119 mijë e 750 euro për shkeljet e bëra në ndeshjen e 15 nëntorit me Zvicrën në Zurich. Dënimi më i rëndë ndaj serbëve është për fyerjet ndaj Kosovës e shqiptarëve. Vendimi i konfirmuar nga UEFA nënkupton po ashtu që Serbia nuk ka të drejtë të shesë bileta për tifozët e saj për ndeshjen ndaj Shqipërisë në Tiranë
Goditje të rëndë i kishte dhënë UEFA më 11 dhjetor Federatës së Futbollit të Serbisë. Për shkak të shkeljeve të shumta që kishin bërë serbët në ndeshjen Zvicër – Serbi, të zhvilluar më 15 nëntor në Zurich, Trupi i Kontrollit, Etikës dhe Disiplinës i UEFA-s e kishte gjobitur rëndë Federatën serbe të Futbollit.
Gjobat më të mëdha ndaj serbëve ishin për fyerjet ndaj Kosovës e shqiptarëve.
Dhe ato dënime janë vërtetuar të premten nga Organi i Apelimit i UEFA-s. Në fakt, Federata serbe kishte paraqitur ankesë ndaj vendimit të 11 dhjetorit, ankesë që është refuzuar nga Apeli i Konfederatës Evropiane të Futbollit.
“Refuzohet ankesa e Federatës së Futbollit të Serbisë. Rrjedhimisht konfirmohet vendimi i Trupit të Kontrollit, Etikës dhe Disiplinës së UEFA-s, i datës 11 dhjetor 2024”, shkruan në vendim.
Për sjellje raciste dhe diskriminuese të shikuesve të saj, Federata e Futbollit e Serbisë ishte dënuar që të mos shesë bileta për tifozët serbë për dy ndeshjet e radhës të Serbisë në udhëtim. Për këtë shkelje, po ashtu Federata serbe u gjobit me plot 50 mijë euro.
Për transmetim të një mesazhi të papërshtatshëm për ngjarje sportive, Federata serbe u gjobit me 25 mijë euro.
Këto dy gjoba kanë të bëjnë me fyerjet ndaj Kosovës e shqiptarëve. Dënimi prej 25 mijë eurosh është për flamujt e Serbisë mbi hartën e Kosovës, ndërsa ai prej 50 mijë eurosh për thirrjet anti-Kosovë.
Për ndezje të fishekzjarrëve, federata serbe u dënua me 8250 euro. Për hedhje të gjësendeve në fushën e lojës me plot 31 mijë e 500 euro. Për dëmet e shkaktuara në stadium, federata serbe duhet të paguajë 5000 euro.
Pra Federata e Futbollit e Serbisë për shkeljet e shumta të huliganëve serbe në Zurich duhet të paguajë plot 119 mijë e 750 euro.
UEFA gati vazhdimisht e dënon federatën serbe për fyerjet dhe panot anti-Kosovë.
Apeli i UEFA-s ka konfirmuar edhe dënimin e Federatës serbe për shkeljet e bëra në ndeshjen ndaj Danimarkës, të zhvilluar më 18 nëntor. Të dy ndeshjet ishin të vlefshme për Ligën e Kombeve të UEFA-s.
Për sjellje raciste dhe diskriminuese të ekipit të Serbisë, federata e këtij vendi u gjobit me 40 mijë euro. Pos kësaj Serbia do ta ketë të mbyllur pjesërisht stadiumin për dy ndeshjet e ardhshme si vendëse.
Për hyrje të tifozëve në fushë, Federata serbe u dënua me 10 mijë euro, ndërsa për fishekzjarrë të ndezur me 3000 euro. Për shkeljet në ndeshjen ndaj Danimarkës, Serbia do t’ia paguajë UEFA-s 53 mijë euro.
Serbia ndeshjen e dytë si mysafire e ka ndaj Shqipërisë, më 7 qershor. Dhe sipas vendimit të fuqizuar të premten, nuk ka të drejtë të shesë bileta për tifozët e saj për atë ndeshje kualifikuese për Botërorin 2026.
