Kryeministri i Kosovës, Albin Kurti, ka bërë të ditur se sot do t’i pret në takim policët të cilët u sulmuan gjatë aksionit kundër kontrabandës në Leposaviq.
Kurti shprehu mirënjohjen për zyrtarët policor, por tha se shpreson që edhe prokuroria e gjyqësori të merren me rastin që mos të përsëriten më raste si ajo në Leposaviq.
“Shpreh mirënjohjen time të madhe për trimërinë dhe profesionalizimin e tyre, por në të njëjtën kohë shpresoj e uroj që edhe hallkat tjerat të sistemit të drejtësisë – prokuroria e gjyqësori, të jenë në nivel të detyrës që mos të na përsëriten raste të tilla. Sot kam caktuar që t’i pres pasdite në orën 17:00 policët e lënduar në Zyrën e Kryeministrit”, ka thënë Kurti pasi u pyet në një konferencë për media nga selia e Lëvizjes Vetëvendosje.
Kurse në një deklaratë të lëshuar më herët ministri i Punëve të Brendshme, Xhelal Sveçla, ka thënë se Prokuroria Speciale ka ngecur për t’i dhënë ndihmë procesit të hetimit të rastit të së shtunës pas operacionit të policisë në Leposaviq kundër kontrabandës.
Ai ka thënë se Porkuroria Speciale nuk është përgjigjur pozitivisht kur i është kërkuar nga policia që të marrë nën hetim ngjarjen e ndodhur. Kritikë bëri edhe ndaj prokurores së Prokurorisë Themelore.
“Zyrtarët policor i kanë kërkuar Prokurorisë Speciale të marrë në hetim ngjarjen. Edhe pas këmbënguljes së tyre, Prokuroria nuk u përgjigj pozitivisht. Ndërkohë, prokurorja e prokurorisë themelore e liroi menjëherë njërin prej kontrabandistëve sulmues të policisë. Ndaj po shpreh edhe një herë tjetër bindjen time të thellë. Hezitimi për të vepruar i organeve të drejtësisë, përkthehet automatikisht në fuqizim të kriminelëve dhe rritje të vetëbesimit tek ta”, tha ministri mes tjerash.
