Reagon deputetja Pacolli: Videoja është manipuluar, agresori sulmoi asistentin tim dhe tentoi të fuste dorën në çantë

Një përplasje e pazakontë mes deputetes së Lëvizjes Vetëvendosje, Fitore Pacolli, dhe qytetarit Agim Pllashniku ka bërë bujë të madhe sot në rrjetet sociale, pasi një video e incidentit ka qarkulluar gjithandej, duke ngjallur reagime të shumta.

Lidhur me rastin, deputetja Pacolli ka dalë me një deklaratë publike për të sqaruar versionin e saj rreth asaj që ndodhi në ambientet e lokalit “Home” në Prishtinë.

Përmes një postimi në Facebook, ajo ka thënë se është përballur me një akt të rëndë kërcënimi dhe sulmi verbal nga Pllashniku, të cilin ajo e cilëson si person me të kaluar të dhunshme dhe me qëllime të qarta provokuese.

Sipas saj, ngjarja nuk ishte e rastësishme, por e organizuar dhe e koordinuar, ndërsa videoja që po qarkullon është, sipas saj, e montuar dhe manipuluar për të fshehur sulmin real ndaj saj dhe stafit të saj.

Ajo pretendon se agresori ka tentuar të fusë dorën në një çantë për të cilën ekziston dyshimi se mund të ketë pasur armë, ndërkohë që dëshmitarë të pranishëm në vendngjarje ishin përfaqësues të Avokatit të Popullit dhe zyrtarë policorë.

Ndërkohë, personi i përfshirë në incident, Agim Pllashniku, është intervistuar nga Policia e Kosovës lidhur me rastin. Ende nuk ka një njoftim zyrtar nga ana e policisë për veprimet që do të ndërmerren më tej.

Ngjarja ka ndezur një debat të ashpër edhe në mediat sociale dhe në disa portale, të cilat, sipas Pacollit, po përpiqen të paraqesin agresorin si viktimë dhe ta relativizojnë sulmin ndaj saj.

Ajo ka akuzuar këto media se po shërbejnë si mjete të dhunës së organizuar politike dhe po përhapin urrejtje me qëllim për ta shtyrë atë të tërhiqet nga angazhimi politik.

Në fund të postimit, Pacolli ka theksuar se nuk do të frikësohet, nuk do të heshtë dhe nuk do të tërhiqet. Ajo ka bërë thirrje që drejtësia të veprojë dhe të mbrojë institucionet dhe përfaqësuesit e tyre nga dhuna dhe kërcënimet.

Reagimi i plotë i deputetes Pacolli: