Arrestimi i Besnik Mujecit të martën në Tiranë nën dyshimet për trafikim droge, ka nxitur edhe reagime të shumta në Kosovë, ku partitë opozitare po e shfrytëzojnë këtë rast për të goditur Lëvizjen Vetëvendosje, pasi Mujeci ishte asamblist i saj.
Pas reagime të djeshme nga LDK e PDK, sot diçka për këtë rast ka shkruar edh lideri i AAK-së, Ramush Haradinaj.
Në fakt, Haradinaj, i ka kërkuar kryeministrit Albin Kurti të dalë me qëndrim për arrestimin e asamblistit të Lëvizjes Vetëvendosje në Komunën e Prishtinës nën dyshimet për trafikim droge, Besnik Mujeci.
“Albin, a je me prokurorin a me Mujecin? Bëhu i gjallë!”, ka shkruar Haradinaj.
E pas këtyre fjalëve ka reaguar deputeti i Lëvizjes Vetëvendosje, Dimal Basha, i cili tha se vendimi i djeshëm për përjashtimin e Mujecit tregon se me kë janë si subjekt politik, ndërsa ia ka përmendur Haradinajt pagesat më të larta prej 11 milionë euro për shpronësime dhe për të cilat nuk ka dhënë ende përgjegjësi.
“Ramush, fakti që e kemi shkarku atë djalin kallxon se me kë jemi! Ne jemi gjithë për drejtësi, por prokuroria nuk po është, po zgjedh kënd me ndjek e kënd jo!
Për shembull, t’ish kanë prokuroria me drejtësinë, ti sot ishe t’u dhanë përgjegjësi për rritjen e çmimit të shpronësimit të autostradës Kijevë – Zahaç, prej 31 në 42 milionë euro”, ka shkruar Basha.
Ai tha se me Haradinajn në krye të qeverisë është marrë vendim të paguhen 11 milionë euro më shumë, pra me dyfishim të çmimeve të vetëm disa parcelave, dhe ky vendim “u bë publik me 31 dhjetor, natën e vitit të ri, që me kalu nën radar!”
Në këtë rast, Basha ka ironizuar me Haradinaj, duke i thënë se është në rrugën e një politikani që dikur e kishte në koalicion.
“Nuk u kanë keq me vet Fatmirin me çka po merret, se asaj udhe je edhe ti!”.
Kujtojmë se dje Lëvizja Vetëvendosje e ka përjashtuar Besnik Mujecin nga të gjitha strukturat e saj.
Alim Rama, sekretar organizativ në VV, ka thënë se pas marrjes së informacionit për arrestimin e asamblistit të Komunës së Prishtinës nga radhët e subjektit, Komisioni Disiplinor i LVV-së menjëherë ka trajtuar këtë rast.
Si rrjedhojë, komisioni i VV-së ka marrë vendim për përjashtimin e anëtarit Besnik Mujeci nga anëtarësia dhe të gjitha strukturat e Lëvizjes VETËVENDOSJE, ka shkruar Rama.
Besnik Mujeci u arrestua të martën në Tiranë nën dyshimet për trafikim droge. Mujeci ishte në mesin e pesë të arrestuarve në Tiranë nën dyshimin për trafikim droge. Sipas Policisë, ky grup u kap me mbi 11 mijë doza droge, në vlerë prej 400 mijë eurosh.
