Komisioni Qeveritar për Njohjen dhe Verifikimin e Statusit të Personave të Dhunuar gjatë Luftës në Kosovë ka reaguar ashpër ndaj përmbajtjes së emisionit “Pressing”, të transmetuar më 2 qershor 2025 në televizionin T7. Në një deklaratë publike, Komisioni shpreh indinjatën dhe shqetësimin e thellë për gjuhën fyese dhe ofenduese që u përdor ndaj viktimave të dhunës seksuale gjatë luftës së fundit në Kosovë.
“Denigrimi, stigmatizimi dhe mungesa e empatisë ndaj dhimbjes, sakrificave dhe përjetimeve të viktimave dhe familjarëve të tyre riinstalon aktin barbar duke vulosur vdekjen e tyre sociale.”
Komisioni thekson se media duhet të jetë aleate dhe jo abuzuese, veçanërisht kur trajton çështje kaq të ndjeshme dhe të dhimbshme për shoqërinë. Në deklaratë shtohet më tej se:
“Aktet e tilla dëshmojnë se media është ende larg përqafimit të kauzave të tilla të cilat nuk janë dhe as nuk mund të jenë mall për konsum mediatik, apo për përmbushje agjendash personale të grupeve të caktuara, apo qëllimeve të ulëta dhe papërgjegjshmërisë me të cilat abuzohen studiot dhe platformat mediatike.”
Komisioni paralajmëron se deklarimet e tilla jo vetëm që ritraumatizojnë të mbijetuarat dhe të mbijetuarit, por edhe dëmtojnë rëndë përpjekjet institucionale dhe shoqërore për të garantuar drejtësi, dinjitet dhe të drejta të barabarta për viktimat.
Në përfundim të deklaratës, Komisioni kërkon reagim të menjëhershëm nga Televizioni T7 dhe nga Komisioni i Pavarur për Media, si dhe bën thirrje për reflektim të thellë nga të gjitha mediat në lidhje me mënyrën e trajtimit të viktimave të dhunës seksuale në platformat publike.
“Në ndërmarrjen tonë si një shtet i ri për të vendosur një të drejtë në vend, për të respektuar dhe për t’ju dhënë mundësinë viktimave për të gëzuar të drejtën e tyre… edhe mediat kanë rolin dhe përgjegjësitë e tyre, të cilën nuk e pamë të shpërfaqej në emisionin Pressing të T7 të datës 2 Qershor 2025.”
