Kryeministri i Shqipërisë, Edi Rama, ka thënë se largimi i forcave serbe nga vija kufitare me Kosovën është pozitive.
Sipas tij, është e papranueshme që ushtrua e një vendi që aspiron të bëhet anëtar i Bashkimit Evropian, të përdoret për shfaqje të tilla në kulmin e tensioneve.
“Vrasja e një efektivi të policisë së Kosovës nga një grup kriminal i armatosur deri në dhëmbë, brenda territorit të republikës së Kosovës dhe zija në Beograd janë të papranueshme, të patolerueshme dhe të dënueshme në të gjitha nivelet. Ky është qëndrimi ynë. Duke qenë promotor të dialogut dhe paqes përfundimtare që kalon nga njohja përfundimtare e Republikës së Kosovës dhe patjetër duke u përpjekur të jemi të drejtë, ne e konsiderojmë këtë zhvillim, ose më saktë këto dy zhvillime, pasi në këndvështrimin tim shpallja e zisë për disa persona që u përfshinë në vrasjen e një efektivi policie, është diçka po kaq e rëndë sa vetë ajo që i parapriu. Jemi të keqardhur për një zhvillim të tillë. Jemi të bindur se e vetmja rrugë është dialogu dhe jo shfaqjet e ushtrisë serbe në kufi me Kosovën të cilat nxisin tensione. Është pozitive që ushtria serbe filloi të zmbrapset por është negative që ushtria serbe përdoret për shfaqje të tilla”, ka thënë Rama.
Dislokimin e forcave serb pranë kufirit me Kosovën Uashingtoni zyrtar e cilësoi si një zhvillim shumë destabilizues dhe i bëri thirrje Serbisë që të tërheq forcat ushtarake nga kufiri me Kosovën dhe të ulë tensionet.
Kurse nga Qeveria e Kosovës bëri të ditur se ushtria serbe lëvizi në tri drejtime.
