Kryetari i Komunës së Prishtinës, Përparim Rama, ka deklaruar se do të jetë i vendosur për të mbrojtur punëtorët e ndërmarrjes publike “Pastrimi”.
Pas një takimi me përfaqësuesit e Sindikatës së Punëtorëve, Rama theksoi se nuk do të lejohet që keqmenaxhimi të rrezikojë shëndetin publik apo të cenojë pagat dhe sigurinë në punë të të punësuarve.
“Nuk do të lejojmë që keqmenaxhimi të rrezikojë shëndetin publik dhe pagat e punëtorëve të ndërrmarjes “Pastrimi”!
Sot prita në takim përfaqësuesit e Sindikatës së Punëtorëve të kompanisë “Pastrimi”.
I falënderoj sindikalistët dhe të gjithë punëtorët për qëndrimin e tyre të përgjegjshëm dhe për bashkëpunimin e tyre të sinqertë në këto momente të kritike për ta dhe qytetarët.
Ne jemi në anën tuaj. Të drejtat tuaja nuk janë të negociueshme, dhe askush nuk do të mbetet pa punë për shkak të dështimeve menaxheriale. Jemi të vendosur të veprojmë me integritet dhe vendosmëri për të mbrojtur interesin publik dhe dinjitetin e punëtorëve”, ka shkruar Rama në Facebook.
Punëtorët e “Pastrimit” protestojnë para Komunës së Prishtinës: “Po i kërkojmë paratë tona”
Ndërkohë, punëtorët e kompanisë “Pastrimi” protestuan para objektit të Komunës së Prishtinës, duke fajësuar komunën për “sabotim të punës”.
