Shqipëria shënon sot një moment të rëndësishëm në procesin e integrimit europian, çeljen e negociatave me Bashkimin Europian për grupkapitullin e parë.
Kryeministri Edi Rama dhe delegacioni që e shoqëron ndodhen në Luksemburg ku do të zhvillohet konferenca e dytë ndërqeveritare Shqipëri-BE, shkruan euronews.al
Në një deklaratë për mediat Rama tha se Shqipëria ka ambicie që të integrohet në BE brenda vitit 2030.
“BE dhe Evropa janë i vetmi vend ku duam të jemi, i vetmi vend që duam t’u lëmë brezave të ardhshme me sigurinë që i lëmë në të vetmen hapësirë, ku liritë, të drejtat, sundimi i ligjit dhe siguria mund të garantohen. Kështu që po, ky moment është i veçantë dhe më duhet të them dhe falë edhe Vladimir Putinit, i cili për shkak të luftës mizore të agresionit, zgjoi nga gjumi edhe më skeptikun dhe i bëri të shohin realitetin që Ballkani Perëndimor është i nevojshëm për një BE më të forte, po aq sa BE, konstelacioni i BE është i nevojshëm për Ballkanin Perëndimor. Kësisoj jemi të dyja palët në një gjatësi vale. Do të bëjmë më të mirën dhe do të vrapojmë shpejt për t’u siguruar që kjo dritare e jashtëzakonshme mundësie të mos mbyllet pa ne, brenda në Bashkimin Evropian… Ne do ta bëjmë gati Shqipërinë për Bashkimin Evropian brenda vitit 2030”, tha Rama.
