Ministri i Bujqësisë, Faton Peci, ka zhvilliuar një takim bilateral në Lituani, ku është pritur nga homologu i tij, Kęstutis Navickas, transmeton KosovaNews.
Përmes një postimi në facebook, ministri Peci ka bërë të ditur se në takim kanë biseduar lidhur me ngritjen e kapaciteteve të Kosovës në instrumentin për ndihmë parahyrëse për zhvillim rural të Bashkimit Evropian – IPARD, në avancimin e politikave, përafrimin e legjislacionit si dhe procesin e dixhitalizimit.
Duke theksuar se me Navickas u dakorduan që produktet bujqësore kosovare të jenë prezent edhe në tregun lituanez, Ministri Peci ndër të tjerash deklaroi se:
“Lituania është një nga prodhuesit më të mëdhenj të drithërave dhe të grurit në botë për kokë banori, e aftë për të eksportuar grurë në sasi të konsiderueshme dhe me cilësi të jashtëzakonshme. Prandaj, edhe biseduam për mënyrën e bashkëpunimit në këtë fushë, duke filluar nga fara e deri tek plehrat.”
“Falënderova për mikëpritjen homologun tim z. Kęstutis Navickas, të cilin edhe e ftova që një të ardhmen të afërt ta vizitojë Republikën e Kosovës dhe të njihet më afër me potencialin zhvillimor që Kosova ofron.”, ka shkruar Peci në Facebook.
