Ministrja e Industrisë, Ndërmarrësisë dhe Tregtisë, Rozeta Hajdari tha se konsumi i Kosovës me grurë e miell sivjet pritet të mbulohet deri në 70 për qind nga prodhimi i brendshëm, ndërsa ka paralajmëruar se së shpejti do të merren masa pas shtrenjtimit të bukës dhe disa artikujve bazë në disa komuna, pavarësisht se çmimet e grurit dhe miellit kanë rënë për 7%.
Këto deklarime ministrja Hajdari i bëri gjatë një konference për media pas një takimi që ka zhvilluar me Shoqatën e Mullisëve të Kosovës.
Hajdari tha se po e analizojnë situatën në treg dhe lëvizjen e çmimeve të produkteve esenciale ndërsa njoftoi se e kanë krijuar një grup të dytë punues, i cili do të merret me analizimin e situatës dhe mëndej do të merren masa ligjore për produktet esenciale veç e veç.
“Do të mundohemi që të lehtësojmë sa më shumë situatën për konsumatorët, me një bashkëpunim me prodhuesit e tregtaret, por duke ngritur edhe legjislacion përkatës për situatën e krijuar. Ne tani e kemi krijuar grupin e dytë punues që do të merret me çmimet e artikujve, si gruri, buka, qumështi dhe artikuj tjerë. Ky grup së shpejti do të merr vendim se si do të vendoset për këtë çështje”, tha mes tjerash ajo.
Për rritjen e çmimit të bukës në disa furra në disa qytete të Kosovës, ministrja Rozeta Hajdari ka thënë se çmimi furnizues i importit i grurit dhe miellit ka pasur rënie që nga muaji maj për 7 për qind.
“Ndonëse kemi rritje të çmimeve në disa furra, çmimet furnizuese të grurit dhe miellit janë kryesisht në rënie. 7% zbritje nga muaji maj prej të dhënave nga Dogana. Kjo evidencë është konfirmuar edhe nga grupi punues, që tregon se në disa furra ka dallime të larta në çmime. Me këtë situatë, ne në vazhdim të analizës nga rrjeti i operatorëve të shitësve me pakicë, shohim që kemi një dallim tepër të lartë. Marzha tregtare e fitimit ka qenë nga 4 deri 19 për qind”, ka thënë ajo./KosovaNews/
