Presidentja e Kosovës, Vjosa Osmani, është takuar me përfaqësues të Odës Amerikane të Kosovës.
Në takim kanë marrë pjesë edhe përfaqësues të Ambasadës Amerikane dhe të USAID-it.
“Në takim është diskutuar për koordinim në promovimin e potencialeve ekonomike të Kosovës dhe fuqizimin e dialogut publiko-privat”, thuhet në komunikatën për media të Presidencës.
Gjithashtu në komunikatë thuhet se “Para anëtarëve të Bordit të Guvernatorëve dhe anëtarëve të Këshillit Drejtues të Qendrës së Arbitrazhit të Odës Amerikane, Presidentja Osmani theksoi rëndësinë e dialogut publiko-privat si proces në të mirë të Kosovës e në shërbim të zhvillimit ekonomik të Kosovës”.
Më tej thuhet se presidentja Osmani ka thënë se “Zyra e Presidentes është vazhdimisht e hapur për koordinim të veprimeve për promovim të potencialit ekonomik të Kosovës dhe shprehu mirënjohje për bashkëpunimin me Odën Ekonomike Amerikane. Në këtë takim, Presidentja Osmani, foli edhe për kontributin e SHBA-së në fuqizimin ekonomik dhe subjektivitetit ndërkombëtar të Kosovës, përfshirë edhe anëtarësimin në organizata të rëndësishme e konventa ndërkombëtare”, thuhet në komunikatë.
