Para udhëtimit zyrtar për në selinë e NATO-s, presidentja Vjosa Osmani priti në takim pune komandantin e Forcës së Sigurisë së Kosovës, gjenerallejtënant Bashkim Jasharin me të cilin diskutuan për tranzicionin dhe rritjen e mirëqenies se ushtarëve dhe ushtarakëve të FSK-së.
Me këtë rast, presidentja u njoftua nga gjenerallejtënant Jashari me aktivitetet dhe zhvillimet aktuale në FSK-0së si dhe për bashkëpunimin dhe koordinimin e ngushtë me partnerin kryesor strategjik, Shtetet e Bashkuara të Amerikës si dhe me shtetet e tjera të NATO-s, lidhur me çështje të sigurisë në vend dhe rajon.
“Vizioni ynë i përbashkët është që Republika e Kosovës të zhvillojë ushtrinë e saj në përputhje me standardet e vendeve anëtare të NATO-së, për të qenë forcë e ndërveprueshme në misionet e përbashkëta me forcat aleate në shërbim të paqes, stabilitetit dhe sigurisë rajonale dhe globale”, thuhet në njoftimin e lëshuar nga Presidenca.
Kujtojmë se presidentja Osmani do qëndrojë në selinë e NATO-s në Bruksel me më 7 shtator. Ajo atje do të takohet me sekretarin e përgjithshëm të kësaj organizate, Jens Stoltenberg.
