Presidentja e Republikës së Kosovës, Vjosa Osmani iu ka shprehur ngushëllime familjes, miqve dhe komunitetit kulturor për ndarjen nga jeta të aktorit Mirush Kabashi.
Osmani tha se aktori Mirush Kabashi ka prekur thelbin e emocioneve njerëzore me një finesë të pashembullt, duke lënë gjurmë në kinematografi.
Presidentja, Vjosa Osmani tutje ka shtuar se Kabashi ishtë zëri edhe i Kosovës me vargjet kushtuar sakrificës dhe luftës për liri e pavarësi.
Aktori i njohur shqiptar, Mirush Kabashi ka vdekur sot në moshën 75-vjeçare.
Ngushëllimi i plotë i Presidentes Osmani:
Sot, kinematografia shqiptare mbeti pa aktorin e madh, ikonën Mirush Kabashi.
Ai kombinoi për mrekulli karizmin, mjeshtërinë dhe përkushtimin, duke prekur thelbin e emocioneve njerëzore me një finesë të pashembullt dhe duke lënë gjurmë të pashlyeshme në krijimtarinë kinematografike.
Secila paraqitje e tij ishte mishërim i angazhimit pasionant dhe të palëkundur ndaj artit.
Ai ishte zëri artistik edhe i Kosovës me vargjet kushtuar sakrificës dhe luftës për liri e pavarësi.
Trashëgimia nga magjia skenike e paraqitjeve të tij do të jetë kujtesë e jona e përhershme!
Ju përcjell ngushëllimet e mia më të sinqerta familjes, miqve dhe komunitetit kulturor!
I përhershëm qoftë kujtimi për Mirush Kabashin!
