Presidentja e Republikës së Kosovës, Vjosa Osmani dhe ushtruesja e detyrës së drejtoreshës në USAID, Kerry Monaghan Hogler kanë nënshkruar marrëveshjen e grantit në vlerë prej 34 milionë e 727 mijë dollarë.
I pranishëm në këtë takim ishte edhe ambasadori amerikan në Kosovë, Jeff Hovenier.
“Amendamenti nr.05 i marrëveshjes së grantit për objektivat zhvillimore nënshkruhet nga Presidentja Osmani në emër të Republikës së Kosovës dhe nga U.D drejtoresha e USAID znj.Kerry Monaghan Hogler, në emër të USAID”.
Në konferencën për media pas ceremonisë së nënshkrimit, Osmani ka thënë se si rezultat i kësaj marrëveshjeje Kosova do t’i ketë në dispozicion 35 milionë dollarë.
“Kjo marrëveshje është dëshmi e mbështetjes së qeverisë dhe popullit tanë për vendin tonë. Një nga objektivat parësore të kësaj marrëveshje është të sigurojë shërbime më të mira për qytetarët tanë. Kjo marrëveshje do të ndihmojë në reduktimin e vazhdueshëm të korrupsionit”, ka thekuar Osmani.
Ndërsa ambasadori Hovenier ka thënë se kjo marrëveshje konfirmon partneritetin afatgjatë të SHBA-së me popullin e Kosovës.
“Mendoj se është e duhur që të konfirmojmë partneritetin afatgjatë të SHBA-së me popullin e Kosovës”, është shprehur Hovenier.
