Ministrja e Industrisë, Ndërmarrësisë dhe Tregtisë (MINT), Rozeta Hajdari, ka thënë se ligji për masat e përkohshme të produkteve themelore në raste të veçanta zbatohet ndaj operatorëve ekonomikë që tregtojnë produktet themelore.
Hajdari ka kërkuar nga deputetët që ta miratojnë Projektligjin.
“Ky ligj zbatohet ndaj operatorëve ekonomikë që tregtojnë produkte themelore. Ky projektligj ka paraparë masa që do të ndërmerren në raste të veçanta. Duke marrë parasysh rëndësinë e miratimit të këtij projektligji, ju ftoj ta aprovoni sepse një ligj i tillë është aprovuar edhe në shtete të rajonit”, ka thënë Hajdari.
Kuvendi i Kosovës ka filluar punimet e seancës së sotme plenare me shqyrtimin e dy projektligjeve, ai për masat e përkohshme të produkteve themelore në raste të veçanta të destabilizimit në treg si dhe për mbështetjen e punëve publike.
Arsyetimin për këtë projektligj e ka dhënë shefja e Grupit Parlamentar të Lëvizjes Vetëvendosje, Mimoza Kusari-Lila, e cila tha se nisma e tillë vjen për të shmangur rrezikun që mund të bëhet me çmimet e produkteve themelore.
Kurse deputeti Ferat Shala nga radhët e PDK-së ka dhënë vërejtje për nismë dhe ka deklaruar se në formën e tillë partia që përfaqëson nuk do të jep votën.
Po ashtu vërejtje ka dhënë edhe deputetja nga radhët e LDK-së, Hykmete Bajrami, e cila tha se kjo mund të dëmtojë marketet e vogla, dhe krijon pabarazi mes atyre që kanë qarkullim të madhe dhe atyre që bëjnë shitje me pakicë.
Kohë më parë, ministri i Financave, Punës dhe Transferve, Hekuran Murati ka thënë se duke marrë për bazë luhatjen e çmimeve në sektorin ndërtimor kanë ngecur shumë punime, prandaj edhe kanë iniciuar Projektligjin për mbështetjen e punëve publike, që parasheh kompensime shtesë për operatorët ekonomikë./KosovaNews/
