Ambasadori i Shteteve të Bashkuara të Amerikës, Jeff Hovenier e ka vizituar sot në zyrën e tij kryeministrin Albin Kurti.
Në ndërtesën e Qeverisë së Kosovës, kreu i ekzekutivit kosovar Albin Kurti sot pasdite ka zhvilluar një takim me diplomatin amerikan, Jeff Hovenier.
Temë e diskutimeve kanë qenë zhvillimet e fundit në vend.
Pas takimit nuk pati deklarime për media as nga ambasadorët dhe as nga Qeveria e Kosovës.
Megjithatë, nga kjo e fundit eventualisht pritet të ketë më vonë komunikatë për media.
Ndërkohë edhe ambasadori i Britanisë së Madhe, Nicholas Abott ka zhvilluar një takim në Qeverinë e Kosovës, por ai me zëvendëskryeministrin e Kosovës, Besnik Bislimi.
Duhet rikujtuar se tensionet së dielës në veri, u shmangën pasi ambasadori amerikan i kërkoi Qeverisë së Kosovës të shtyjë për një muaj afatin për vendosjen e reciprocitetit a i përket dokumenteve të Serbisë për hyrje/dalje në kufi.
Kujtojmë se dje ambasadori i ShBA-së në Kosovë, Jeff Hovenier, ka thënë se dy masat e Qeverisë së Kosovës, ajo për reciprocitet për dokumente dhe ajo për targa, ishin në përputhje me faktorin ndërkombëtar.
Përmes një postimi në Tëitter, Hovenier ka thënë se ShBA-ja e mirëpret vendimin e Kosovës për pezullimin e përkohshëm të këtyre masave, deri më 1 shtator.
“ShBA-ja mirëpret vendimin e liderëve të Kosovës për të pezulluar përkohësisht zbatimin e masave të reciprocitetit për targat dhe dokumentet hyrëse/dalëse, të dyja masat janë plotësisht në përputhje me marrëveshjet e Brukselit dhe ishin të koordinuara me komunitetin ndërkombëtar”, ka shkruar Hovenier.
Vendimin për pezullimin e përkohshëm të këtyre dy masave, Qeveria e Kosovës e ka marrë të dielën vonë, pas konsultave me ambasadorët e ShBA-së dhe BE-së, për shkak të tensionimit të situatës në veri.
Pas vendimit, të hënën pasdite janë larguar të gjitha barrikadat në rrugët që çonin drejt dy pikëkalimeve kufitare në Bërnjak e Jarinje, të cilat ishin vendosur nga qytetarë serbë me qëllim të kundërshtimit të masave.
Qeveria e Kosovës është zotuar se me largimin e barrikadave, vendimet do të pezulloheshin, derisa gjatë ditës së hënë, deri në largimin e tyre, janë lëshuar më shumë se 1,500 fletëlëshime hyrje-dalje nëpër pikat kufitare, bazuar në vendimin për reciprocitet për dokumente me Serbinë.
