Presidentja vendit, Vjosa Osmani dhe kryeministri Albin Kurti, por edhe ambasador të shteteve perëndimore, kanë bërë sot homazhe duke vendosur lule të freskëta te përmendorja dedikuar personave të zhdukur, në Ditën Ndërkombëtare të të Zhdukurve me Dhunë.
Homazhe së bashku me krerët e shtetit ka bërë ambasadori i ShBA-së në Kosovë, Jeffrey Hovenier, bashkë me zëvendëskryeministrin Besnik Bislimi, ministrin e Mbrojtjes, Armend Mehaj, ministrin e Shëndetësisë, Rifat Latifi dhe zëvendëskryeministren Emilia Rexhepi, si dhe zyrtarë tjerë të lartë.
Sot është Dita Ndërkombëtare e Personave të Zhdukur. Kur janë bërë 23 vjet nga përfundimi i luftës në Kosovë, zyrtarisht edhe mbi 1600 persona figurojnë si të zhdukur.
Kjo ditë do të shënohet me disa aktivitete në Kosovë.
Pas përfundimit të luftës në Kosovë, në vitin 1999, të zhdukur kanë qenë rreth 6.500 persona. Që nga ajo kohë janë kryer disa zhvarrime në varreza masive në Kosovë dhe Serbi dhe deri më tash janë gjetur rreth 70 për qind e të zhdukurve./KosovaNews/
