Deputetja e PDK-së, Blerta Deliu-Kodra, ka thënë se shpallja si antikushtetues i Ligjit për Këshillin Prokurorial nga Gjykata Kushtetuese është lajm i mirë për drejtësinë dhe pavarësinë e saj.
Ajo ka thënë se me këtë u vërtetua përpjekja e Qeverisë për ta vënën nën kontroll dhe për ta cenuar profesionalizmin e KPK-së.
“Është hap i mirë drejt mbrojtjes së rendit kushtetues. PDK edhe njëherë e dëshmoi se i shërben interesave të popullit të Kosovës duke mbrojtur rendin kushtetues dhe ngjashëm do të veprojë me secilën nismë të tillë. Ai që e shkel Kushtetutën është super kriminel deklarohej Kurti në opozitë e tash ministrat e tij e kanë shkelur disa herë atë dhe të tillët jo veç që nuk kanë konsekuenca por lartësohen nga kjo Qeveri”.
E, ministrja e Drejtësisë, Albulena Haxhiu, i është përgjigjur Deliu-Kodrës duke thënë se vendimi i gjykatës mund të jetë lajm i mirë vetëm për PDK-në. Ajo ka thënë se për ndrydhje të sistemit të drejtësisë janë përgjegjëse edhe qeveritë e kaluara.
“Zonja Deliu vendimi i gjykatës për Ligjin për KPK-në, nuk është lajm i mirë për drejtësinë por është lajm i mirë vetëm për ju si parti opozitare dhe grupet e interesit brenda sistemit të drejtësisë. Sa kanë ata përgjegjësi e keni edhe ju që e keni ndrydhur e shtrydhur sistemin e drejtësisë. Një nga arsyet se pse ne kemi marrë mbështetje te madhe janë drejtësia dhe punësimi prandaj aktgjykimi është lajm i keq edhe për qytetarët. Unë do të komentoj në vendimet e KGJK kur për të njëjtin projektligj kemi pasur dy opinione pozitive nga Komisioni i Venecias, do të bëjmë ndryshimet pa humbur kohe dhe do t’i sjellim në Kuvend, më vjen keq që duhet të ju dëshpërojmë por nuk do ta lejojmë korporatizmin brenda sistemit të drejtësisë”, është shprehur Haxhiu.
Deliu-Kodra i ka reaguar sërish ministres gjatë diskutimit në Kuvendin e Kosovës duke i thënë se përmes këtij ligji po mundohet ta kapë sistemin.
“Ky shtet themelet e të cilit janë ndërtuar me mund e sakrificë nuk do të shndërrohet në shtet autoritar sado që mundoheni ju që t’ia jepni sundimin sundimtarit Kurti me këtë ligj. Një ministre e drejtësisë që merr guximin të atakojë vendimet e institucioneve të drejtësisë nuk ka vend në institucionet e Kosovës. Unë dua ta pyes kryeministrin Kurti a janë superkriminelë shkelësit e kushtetutës së Kosovës?”
