Kryeministri i Kosovës, Albin Kurti u ka dorëzuar një ofertë me shkrim Organizatës së Veteranëve të Luftës së UÇK-së, ashtu siç kishte paralajmëruar muajin e kaluar kur kishte pritur në zyre krerët e OVL të UÇK-së.
KosovaNews ka siguruar ofertën që ua ka dërguar kryeministri Kurti krerëve të OVL-së.
Sipas kësaj, Kryeministri Kurti ka propozuar dy alternativa, njëra prej tyre është që menjëherë dhe bashkërisht të fillojë hartimi i një ligji të ri, i cili e nis një proces të vlerësimit dhe verifikimit të të gjithë pjesëmarrësve të luftës çlirimtare.
Sipas kësaj, derisa të përfundojë ky proces, si mbështetje shtesë, kryeministri Kurti propozon përkrahje në punësimin e veteranëve përmes masave aktive të tregut të punës, duke subvencionuar një pjesë të pagës për një periudhë të caktuar.
Alternativë ndaj këtij propozimi të Kryeministrit Kurti mbetet zbatimi i ligjit në fuqi për kategorizimin e veteranëve, i cili në momentin e miratimit, nga çfarë kemi kuptuar në takimin e qershorit, ka pasur edhe mbështetjen e OLV të UÇK-së.
“Ne besojmë se me këtë propozim sigurohemi që të kemi një listë përfundimtare dhe të saktë të veteranëve, duke i bërë nder luftës dhe sakrificës së popullit tonë dhe duke mundësuar një trajtim të dinjitetshëm atyre që dhanë kontributin e tyre në çlirimin e vendit”, thuhet në propozimin e kryeministrit Kurti, shkruan KosovaNews.
“Të dy alternativat do të zhvilloheshin veçmas dhe pa e penguar apo ndikuar procesin gjyqësor në zhvillim e sipër.”, thuhet në propozim.
Kujtojmë se gjatë muajit të kaluar, organizatat e dala nga lufta kishin organizuar protesta para Kuvendit të Kosovës, duke kërkuar nga Qeveria përfshirjen në ligjin për pagën minimale që ishte përcaktuar të jetë 264 euro për sektorin privat.
Një ditë pas protestave të organizuara, kryeministri Albin Kurti kishte pritur në takim përfaqësuesit e OVL-ve të UÇK-së, takim ky i cili zgjati përreth tri orë dhe përfundoj pa marrëveshje konkrete në mes të palëve.
Në fund të takimit, kryeministri Albin Kurti, kishte deklaruar se Veteranëve të Ushtrisë Çlirimtare të Kosovës, do t’u dorëzohet nga Qeveria një ofertë me qëllim të arritjes së marrëveshjes në mes të palëve./KosovaNews
Lexo edhe:
