Deputetja e Partisë Demokratike të Kosovës, Eliza Hoxha, e ka akuzuar kryeministrin Albin Kurti se e ka instrumentalizuar çështjen e të pagjeturve me miratimin e Deklaratës për Personat e Zhdukur të martën në Bruksel, në takimin e nivelit të lartë me presidentin serb Aleksandar Vuçiq.
Deputetja e PDK-së ka thënë se do të donte që kryeministri Kurti të ishte i pranishëm në seancën e Kuvendit që t’u kërkonte falje familjarëve të të pagjeturve për dy mashtrimet që pretendon se i ka bërë.
“Besoj të gjithi që vini në seancë kaloni në korridorin që sjell rrëfime për të pagjeturit. Uroj që i keni lexuar fragmentet e shkurtra në mure për ndjenjën e familjarëve. Më 2 maj, në Bruksel rrëfimi i tyre është rrokullisur, dhimbja e tyre është baraspeshuar, duke e lënë në ndërgjegjen e kryeministrit i cili e ka instrumentalizuar çështjen e të pagjeturve. Sot kam zgjedhur të jem zëri i tyre dhe uroj këto minuta të na mjaftojnë për të dëgjuar diçka për dhimbjen dhe pritjen mbi 20-vjeçare të familjarëve. Sot do të doja kryeministri të ishte këtu dhe t’u kërkonte falje të pagjeturve”, ka thënë ajo në seancën e Kuvendit.
Hoxha më pas lëshoi këngën “Për ata që (s’)janë”, e cila u kushtohet të zhdukurve nga lufta e fundit e që këndohet nga vetë ajo.
Kurti dhe Vuçiqi miratuan të martën Deklaratën për Personat e Zhdukur, ku përfshihet termi “të zhdukurit me forcë”. Deklarata është kritikuar gjerësisht nga opozita.
