Zëvendëskryeministri i Kosovës, Besnik Bislimi, është shprehur i bindur se Republika e Çekisë do ta shtyjë përpara procesin e liberalizimit të vizave për Kosovën gjatë mandatit të saj në kryesimin e Bashkimit Evropian.
Bislimi ka thënë se vënia e Kosovës në agjendë për liberalizimin e vizave më 13 tetor është një hap shumë i rëndësishëm, por jo përfundimtar. Megjithatë, ai e ka vlerësuar Çekinë për këtë lëvizje.
“E çmojmë faktin se e keni vendosur lartë agjendën e liberalizimit të vizave për Kosovën. Kosova do të jetë në agjendë më 13 tetor. Ky është hap i rëndësishëm, por jo përfundimtar. Janë pesë procedura. Jemi të bindur se Çekia do ta shtyjë përpara këtë proces sa është në krye të BE-së. Ky është hap i rëndësishëm për qytetarët tanë. Procesi i liberalizimit është i rëndësishëm jo vetëm si simbolik, por edhe në politikë pasi do ta rritë kredibilitetin. E informova Lipavskyn, se Qeveria jonë që nga fillimi është përfshirë në mënyrë konstruktive me dialogun me Serbinë”, ka thënë Bislimi në konferencë për media të enjten pas takimit me ministrin e Jashtëm të Çekisë, Jan Lipavsky.
I dyti i Qeverisë theksoi se janë të përkushtuar në bashkëpunim rajonal dhe për forcimin e bashkëpunimit ekonomik me Çekinë.
