Heshtja e Bashkimit Evropian përballë deklaratave të presidentit të Serbisë, Aleksandar Vuçiq, që ka kundërshtuar Planin evropian për dialogun Kosovë-Serbi, nga ekspertë të rajonit po shihet si dështim.
Të hënën, ndërmjetësit evropianë u shprehën se kryeministri i Kosovës dhe presidenti i Serbisë u pajtuan për përmbajtjen e Planit evropian. Një nga pikat është që Serbia të mos pengojë anëtarësimin e Kosovës në asnjë organizatë. Megjithatë, që të nesërmen, Vuçiqi në Serbi u shpreh se s’do ta lejojë pranimin e Kosovës në Organizatën e Kombeve të Bashkuara.
Jakub Bielamowicz, njohës i çështjeve të Ballkanit Perëndimor, ka thënë se nuk është habi që BE-ja po hesht.
“Presidenti autokrat i Serbisë, Aleksandar Vuçiq, hodhi poshtë ‘marrëveshjen e normalizimit’ të cilën e festuan zyrtarët e BE-së si marrëveshje të përfunduar dy ditë më parë. Por mos prisni ndryshim të politikës. Pavarësisht një tjetër poshtërimi, ata do ta lavdërojnë si ‘konstruktiv’”, ka shkruar Bielamowicz në Twitter.
Dështim të BE-së dhe SHBA-së e ka parë këtë deklaratë edhe politologu Jasmin Mujanoviq.
“Vuçiqi i Serbisë kategorikisht refuzon që Kosovës t’i mundësohet marrja e ulëses në OKB (ose, në çfarëdo organizate ndërkombëtare tjetër). Refuzim i plotë, në thelb, i marrëveshjes ‘së rëndësishme’ që ‘e pranoi’ (por nuk e firmosi) dy ditë më parë në Bruksel. Tjetër dështim i përpjekjeve BE-SHBA për qetësim”, ka shkruar Mujanoviq.
Serbia's Vucic categorically rejects allowing Kosovo to take a seat at the UN (or, presumably, other international orgs). A complete rejection, in essence, of the "landmark" deal he "accepted" (but did not sign) two days ago in Brussels. Another failure of U.S.-EU appeasement. https://t.co/vfoWApiomu
— Jasmin Mujanović (@JasminMuj) March 1, 2023
