Policia e Kosovës ka bërë të ditur se arrestimi i Dardan Molliqajt ka ndodhur pasi i njëjti kishte një urdhërarrest, për çka ishte në kërkim.
“Policia e Kosovës (PK), bazuar në urdhër arrestin e lëshuar nga organet e drejtësisë, sot në orët e pasdites në rrugën ‘Agim Ramadani’ në Prishtinë, ka arrestuar personin D.M, i cili ishte në kërkim”, thuhet në komunikatë.
Sipas njoftimit, njësitet policore, po ashtu kanë arrestuar edhe tre persona (F.K, Z.H, G.K,), të cilët kanë penguar zyrtarët policorë gjatë kryerjes së detyrës zyrtare, të cilët kanë tentuar t’u pamundësojnë zyrtarëve policorë zbatimin e urdhër arrestit.
Policia ka dhënë sqarime shtesë, duke thënë se të gjitha veprimet e zyrtarëve policorë janë realizuar konform autorizimeve ligjore, përderisa veprimet e mëtejme do të ndërmerren në bashkëpunim dhe koordinim me organet e drejtësisë.
