Policia e Kosovës ka gjetur një depo në afërsi të stacionit të Mitrovicës së Veriut, produkte medicinale dhe nuk iu dihet origjina.
Lajmin e ka konfirmuar zëvendësdrejtori i Policisë në veri të Mitrovicës, Veton Elshani, i cili tha se e kanë njoftuar Doganën e Kosovës dhe Agjencinë e Kosovës për Produkte dhe Pajisje Medicinale (AKPPM) për të kuptuar rreth përmbajtjes.
Ai ka bërë të ditur se janë duke verifikuar nëse i takojnë Spitalit Rajonal të Mitrovicës.
“Pas pranimit të informacioneve se në një depo/magazinë në afërsi të stacionit të autobusëve mund të kemi mall të kontrabanduar. Policia ka reaguar dhe kemi kuptuar se aty ka produkte medicinale për të cilët nuk dihej origjina. Sot kemi thirrur Doganën dhe Agjencinë e Kosovës për Produkte Medicinale, ndërsa në ndërkohë kemi kuptuar se kjo depo mund të kishte produkte medicinale brenda, e që menaxhohen nga Spitali Rajonal i Mitrovicës Veri. Tani së bashku me personelin e spitalit jemi në proces të verifikimit të kësaj depoje”, ka thënë Elshani.
